يوم 25 يناير ...تمام يا فندم الامن مستتب

في يوم 25 يناير احب اقول لكل شرطي في مصر المحروسة كل سنة وهو طيب بمناسبة عيد الشرطة ..هههههه
مش عارف علي ايه لكن ده الواجب ياجماعة لازم نهني ونبارك وجدو مبارك مش هيبقي احسن مني لما يروح يهني وانا اقعد ساكت كده ميصحش برده ولا ايه رايكم
المهم ان سعادة الريس زي عادته من اكتر من 26 سنة لازم يسمعنا صوته ويطمنا علي الحنجرة الكريمة بخطاب اسطوري وتهتم به قنوات العالم المصري مثل القناة الاولي العالمية والثانية الفضائية والثالثة الفرنسية وهكذا
وقدم الريس تهانيه الحارة لابنائه الرجال البواسل في هذا العيد الكريم
ووجه سعادة الرئيس اشادة مستحقة ..اه والله.. الي ابنائه من وزارة الداخلية
واشاد الرئيس بجمال الوزارة وحلاوتها وشياكتها ..هههههه
لا حقيقي اشاد سعادته بالتطورات اللي حدثت في الوزارة طبعا في عهده وعهد عمو العادلي
وتحدث ايضا في الانتهاكات التي تحدث في الاقسام ..طبعا مش بصراحة كده لكن علي المتغطي
فطبعا احنا عارفين ان الشرطة دول ملائكة معصومين من الاخطاء وسعادته محبش يغلط فيهم ويعترف بالانتهاكات علشان ميقعش في الاثم الشرعي العظيم ده
وواصل الرئيس كلامه قائلا بالنص.....اقول لمن ينصبون انفسهم اوصياء علي اوضاع حقوق الانسان في العالم اين كنتم حين ضربت الفوضي شعوبا عديدة ؟ كيف كان تحرككم عندما طالتكم يد الارهاب ؟واين انتم مما يتعرض له الشعب الفلسطيني من اعتداءات وحصار ومعاناة؟.....
وده طبعا في اشارة مبهمة الي تقرير البرلمان الاوروبي عن انتهاكات حقوق الانسان في مصر المحروسة
وزي الدستور ما قالت اليوم في عدد الجمعة كأن الرئيس يبرر انتهاك حقوق الانسان في مصر بأنها مشكلة عالمية وانه منتهكة في اسرائيل وفلسطين والعراق...وطبعا الكلام ده مش صحيح... لكن هو الكلام بفلوس وده طبعا جدو مبارك يعني محدش يقدر يقوله انت بتقول ايه غير ماما سوزان
وكأن الرئيس زي ما الدستور بيقول اشمعني احنا اللي بتتلككوا لنا
مرة تانية ياجماعة لازم كلنا نهني حبايبنا ظباط وظابطات مصر الاكفاء اللي ياعيني بيظبطوا الامن في مصرنا الحبيبةبالاعتقال والانتهاك للنفس والعرض والمال

ربنا يهدينا ويهديهم