قدسنا الاسير

اعتذر كثيرا عن تأخري في هذا البوست بس صدقا بسبب انشغالي الشديد

بالأمس القريب سأل عمر بن الخطاب سؤالا لفرسانه ان تمنوا فتمني البعض كنزا لينفقه وتمني آخر ذهبا لينفقه

فقالوا تمني انت يا أمير المؤمنين فقال اتمني ملأ هذا البيت فرسانا كأبي عبيدة

عذرا ياقدسنا الأسير

فليس مناولا بيننا ما تمناه الامير

وليس في الساحات من يغار ويعلن النفير

ولا حتي من يدعي صلاحا الي الاقصي يسير

عفوا لاتظن ان ما قلته ادعاءا وتبريرا

أأ

اصعب ما في الحياة

اعجبتني كثيرا كلمات اخ لي احترمه واوقره , حينها كنت جالسا معه ينصحني وهو يكبرني بعشرين عاما

وكنا نتحدث عن الاخوة في الله و قد تذكرنا استاذنا الدكتور محمد علي بشر

فذكر لي انه ذهب احد اخواننا الي الدكتور شاكيا اليه سوء معاملة بعض من اخوانه له

وانه لم يعد قادرا علي هذا الظلم و انه لولا علاقة الاخوة التي تجمعهم لكان قد رد علي هذا الظلم ردا قاسيا ولكنه مازال متمسكا بهذه الاخوة

فرد عليه استاذنا الدكتور برد اعتبره وجيزا مفصلا سهلا ومنيعا

وجه اليه سؤالا فقال لو انك اعتقلت او تعرضت لتعذيب او صادرت اجهزة الامن اموالك او ليس هذا بظلم او ليست هذه بقسوة

فقال بلي ولكنه ابتلاء من الله عزوجل

فقال وخذا ايضا ابتلاء من الله عزوجل فلماذا اذن نصبر علي ظلم الآخرين ولا نصبر علي ظلم وقسوة اخواننا علينا؟

عندما تعجز القلوب

عندما تعجز القلوب عن حب الآخرين

عندما تذبل القلوب وتفسد ولم يعد لها فائدة غير الحقد علي الاخرين

عندما لم نعد قادرين علي التقرب من الاخرين الا للمصلحة ولم يعد هدفنا الا المنفعة

عندما نسينا الاخوة في الله والحب في الله

لماذا اصبحنا نعيش في غابة كل انسان ليس له هدف الا اخذ ما في يد غيره

عجزت قلوبنا عن العيش في حب واخوة فيما بيننا فلماذا ننتظر العيش في سلام واطمئنان وحب

اخواني هذه دعوة الي الرجوع لنهج رسول الله صلي الله عليه وسلم

دعوة الي الرجوع لنهج السلف الصالح

ارجع الي اخوك في الله وقل له اني احبك في الله

فليس لنا الا الله

دعواتكم

كتبت هذا البوست بالعربية الفصحي تضامنا مع اخواني في حملة (لغتي هويتي)

إديها حرية

إخواني الاعزاء جاءنا الخبر التالي:

قرار رئيس الجمهورية رقم (1): اقالة حكومة احمد نظيف وتشكيل حكومة وطنية تشترك فيها الاحزاب والقوي السياسية وتوزع الحقائب الوزارية بنسب تمثيلها بالبرلمان

قرار رئيس الجمهورية رقم (2): حل البرلمان المصري بعد ثبات بطلان نتيجة اغلبية اعضائه والاسراع في اجراء انتخابات عادلة .....وبلاش كلمة نزيهة علشان بتفكرني بالزمن اللي فات

قرار رئيس الجمهورية رقم (3): الافراج عن كل المعتقلين السياسيين في كل سجون القطر المصري شاملة المحكوم عليهم بمحاكمات عسكرية

قرار رئيس الجمهورية رقم (4): اجبار كل المزارعين بزراعة نصف المساحة المملوكة لهم بالقمح لتحقيق الاكتفاء الذاتي من القمح وشراء القمح منهم بالسعر العالمي

قرار رئيس الجمهورية رقم (5): توزيع القمح علي الشعب الغلبان المسكين

قرار رئيس الجمهورية رقم(6): وقف مسلسل الاهمال الحكومي من رشوة وفساد واستبداد طال وعاني منه الشعب طوال اكثر من 27 عاما من الظلم والاستبداد وتعويض المتضرر

قرار رئيس الجمهورية رقم(7): القبض علي كل سارق ومستولي علي اموال الشعب وارجاع الاموال وايداعها في خزانة الدولة

قرار رئيس الجمهورية رقم(8): القبض علي صاحب العبارة والمتسبب في قتل اكثر من 1033 مواطن من ابناء هذا الشعب

قرار رئيس الجمهورية رقم(9): رفع الاجور بما يتناسب مع الزيادة العالمية مهما كلفت خزانة الدولة

قرار رئيس الجمهورية رقم (10): فرض الزكاة علي كل افراد الشعب القادر منهم والمستطيع

نفسي احلامي وامنياتي ده تتحقق ...يحصل ايه يعني لو رئيس دولتنا المبجل تقرب من شعبه وحققله امنياته

ونفسي اعرف ليه كل مسؤول في الحكومة الفقرانه ده بيحسسنا انه بيصرف علينا من جيبه بلاش اقول حاجة تانية وكأنها عزبة(تييييييييييت) بلاش برده اكمل

وما زال القلب ينبض

وما زال القلب ينبض

يااااااااااااااااااه

فعلا كنت متوفي في عالم لايقبل الا بمن يستحقون هذه الصحبة الطيبة

لكني كنت احيا في عالم من الصعب وصفه فهو اقل ما يطلق عليه عالم الاحزان والشكوك

ههههههههههههههههه

الاحزان علي اللي بيحصل فيه من غم الامتحانات وقرفها

وشكوك في اساتذة كل مادة لانك بتقعد طول الليل تقول ياتري ياهل تري هيعملوا فينا ايه بكرة

ده غير بقي الكوابيس والاحلام كل يوم والتاني

بصدق والله ياجماعة مكنتش بعرف انام

كل ما انام اتفزع رعبا من المادة اللي همتحنها

ههههههههههههه

الاكبر من كده اني اتفاجأت اني مش لوحدي وطلع كل زملائي كده

بس الحمد ادينا لسه عايشين واخدنا اجازة خلاص من العالم اللي كنت بحكي لكم عليه ده

وطبعا مش عايز اكرر اسمه كل شوية لاننا طبعا في اجازة

وعلشان كده انا لما رجعت الحمد لله قررت اني اتكلم في موضوع اللي ميتسماش ده وبرده مش هقول الاسم exams

انا بس عايز اقول انه الامتحانات عبارة عن حقن الطالب بياخدها في فترة الامتحانات وطبعا الحقنة لاما تبقي حنينة لاما تبقي تقيلة اوي

ومش عايز اقول ان مفيش حقن خفيفة

لكن اللي بقيت اقعد كتير افكر فيه هو ليه استاذ دكتور محترم ..ربنا يجعل كلامي خفيف عليهم..بيحاول دايما يحط الامتحان صعب او زي ما بنقول بيعجز الطلبة

بتعجب فعلا لما الاقي دكتور بيعند مع الطلبة ويحط الامتحان صعب وكمان بيكون سعيد بكده

حاجة فعلا بتخليني نفسي اقوم اخلص عليه واخلص انا كمان

ههههههههههههههههه

نفسي اروح لواحد منهم اقوله ياعم الحاج ارحم نفسك وارحمنا واتقي الله انت كده كده مش خسران حاجة لكن الطالب هو اللي خسران

ولا ايه؟؟؟

يلا الحمد لله انها عدت علي خير

كلمات

اسمي معاني العدالة هي عدالة الضمير

اذا لم يكن لك رأي فستكون ضحية لأي رأي

الموت أول المخاوف وآخرها

اخص علي المعلم الهزء الطيشة ..لما يُعُد علي القهوة ويمسك الشيشة

أجهل الناس من ترك يقين ما عنده لظن ماعند الناس

إذا اشتد الكرب هان

رب أمر سر آخره..بعد ما ساء ت أوائله

لا تبيع هيبة الصمت بالرخيص من الكلام

الدنيا ياغالب يا مغلوب ..فيها اللي عايز يبقي غالب ..وفيها اللي يرضي يبقي مغلوب

وللاسف كلنا عايزين نبقي مغلوبين

اخيرا فانا اعتذرلكم عن عدم متابعة عالم التدوين فترة من الزمن ليست بالكبيرة

لكنها بالنسبة لي كبيرة جدا

وده والله ياجماعة غصب عني وانتوا عارفين بقي الامتحانات وقرفها

لكن هنقول ايه حسبنا الله ونعم الوكيل في نظام التعليم الفاشل اللي يخلي الطلبة يمتحنوا في اخر السنة

يلا كل سنة وحضراتكم طيبين

ان شاء الله ألقاكم يوم 6/4 باذن الله

ودعواتكم بقي ياجماعة انا اخوكم الصغير برده

عودا حميدا

عاد بحمد الله الوالد الكريم امس الثلاثاء في تمام الساعة العاشرة مساءا

صباحا كان الوالد عنده عرض وكان الوضع ميطمنش خاصة انه كان فيه عرض برده للمعتقلين علي اثر احداث المحلة

وكان المجمع كله مقلوب وممنوع حتي اننا نسلم عليه او نقعد معاه

لكن الحمد لله صدر القرار بالافراج من سرايا النيابة

وطبعا بعد شوية اجراءات غبية ملهاش لازمة اترحل علي السجن وبعدين اترحل علي مكتب امن الدولة في المحلة الساعة الرابعة عصرا والحمد لله دخل البيت الساعة العاشرة مساءا

طبعا فترة الاعتقال دامت لمدة شهرين ونصف

ومازال في سجن طنطا 8 من الاخوان

ربنا يأجرهم ان شاء الله ويجعله في ميزان حسناتهم

رسالة من قصر الرئاسة

بمناسبة علاوة سيادة الرئيس والمكافآت اللي عماله ترف علي الشعب كله

بمناسبة علاوة ال 30% اللي لسه الواحد مننا محتار والله يعمل بها ولا ايه وعلي رأي واحد بيقول 145 جنيه هعمل بهم ايه ولا ايه

ده رسالة السيد الرئيس....رئيس الجمهورية

ياشعبي ياحبيبي ياروحي يابيبي ياحطك في جيبي يابن الحلال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله ده حال

احبك محشش مفرفش مطنش ودايخ مدروخ وآخر انسطال

لكن لو تفكر تخطط تقرر تشغلي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

هبهدل جنابك واذل اللي جابك وهيكون عذابك دا فوق الاحتمال

هتقبل هحبك هترفض هلبك هتطلع هتنزل هجيبلك جمال

ماتت فينا النخوة

ماتت فينا النخوة

والحقيقة ان النخوة المقصودة هي نخوة العربي تجاه اهله وذويه

نخوته تجاه شرفه وكرامته

اصبحت الامور الان في علاقات البنات والاولاد عادية جدا وايه يعني لما اخرج مع زميلتي وايه يعني لما اكلمها في التليفون

وايه يعني لما نقعد مع بعض في اي مكان لوحدنا

ياعم ده مجرد تسلية

طيب وانتي برده مجرد تسلية ...يعني مش خايفة علي مستقبلك وسمعتك ..ولا برده الموضوع بقي عادي

انا لما كتبت البوست ده مكنتش اقصد البنت والولد ولكن قصدت الاصل ..المنبع ..المصدر

للاسف كنت اقصد الاب..الام..الاسرة

كنت بتكلم مع واحد من زملائي في الكلية

والحقيقة بدأ يحكي لي قصة كانت سببا في كتابة البوست ده خاصة بعد طلب اخي محمد صاحب مدونة صيد الخاطر نشره

كان بيحكي انه فيه بنت يعرفها وبيقابلها وكمان بيكلمها في التليفون وكانت مجرد تسلية

وكانت البنت هي دايما اللي بتتصل بيه حتي ان والدها دخل عليها مرة وهي بتكلمه فسألها بتكلمي مين فكانت الكارثة انها ردت عليه بكل سهولة انها بتكلم ميدو...

ههههههههههه

افتكرت ساعتها احمد حلمي ونور لما قالتله يابني متقلقش باباه لارج فقالها ياشيخة قلتله ان الفوطة مش بتاعتي

هههههههههههه

يانهار ابيض يعني الاب اصبح كل همه انه يعرف مين بس اللي بيكلمها

يعني لو كان اللي بيكلمها ابراهيم مينفعش ويبقي غلط ولا هو لازم يكون ميدو

هو اصلا ميعرفقش ميدو مين

لاحول ولا قوة الا بالله العلي العظيم

واحد تاني اتصل برده بواحدة فأخوها اللي رد عليه فبيقله فلانة موجودة فرد عليه بعنف فقال خلاص هتهزأ دلوقتي وهتبقي ليلتي بيضه

فرد عليه قاله اقولها مين؟

يعني برده المشكلة في الاسم مش في صلب الموضوع

هو ياجماعة الموضوع بقي سهل اوي كده

بقينا بنتساهل اوي كده ولا الموضوع معدش يفرق مع الآباء واصبح الآباء كلهم لارج

ده كده احنا بقينا 6 اكس لارج مش لارج

ياجماعة حرام اللي بيحصل ده

مش كل حاجة بتحصل نجيب السبب علي ايمان الاولاد وعدم تمسكهم بدينهم ولو ان ده الاصل والسبب الاول والاكبر لكن التربية والتنشأة بتلعب دور كبير جدا

ايضا متابعة الآباء لاولادهم والاهتمام بهم ومسائلتهم لها دور كبير جدا

لكن ياجماعة اللي بيحصل في الجامعات الان لايرضي الله عزوجل

ولا خلاص معدتش تفرق بالنسبة لنا

ارجع واقول انه فعلا ماتت فينا النخوة!!!!

اجدادنا

يمكن لاننا من مواليد قرن الاختراعات والاكتشافات القرن العشرين مش حاسين بالموضوع ده

ويمكن لاننا من مواليد اواخره

بس اكيد كنا هنحس بالمعاناة ده لو احنا مثلا مواليد 1930 ولا 1920

انا الحقيقة بتكلم عن مدي فهم اجدادنا لاختراعات اليوم

مش عارف بيبقي نفسي اعرف شعورهم لما يشوفوا اختراع جديد

يعني اليوم اللي اخترعوا فيه الموبايل ولا العربية ولا الطيارة بيبقي ايه شعورهم لما يشوفوا الحاجات ده

لحد دلوقتي ستي كل ما تحتاج حد من اعمامي تقولي اتصل بهم علي البتاع ده اللي هما شايلينه

واقعد اقولها يا ستي ده اسمه موبايل طب اسمه محمول لكن مفيش فايده

فعلا مش عارف !!!!

قلقان ليه ؟

ياريت نجاوب من غير فزلكة

ياريت نتصارح وبدون تجمل

قولي

صارحني

جاوبني

قلقان ليه ؟

مجزرة المحلة

اخواني اكتب اليكم اليوم وانا في اشد حالات الدهشة مما يحدث في مدينتي
مدينة المحلة من اجمل وكبر مدن مصر عامة فهي اكبر مدينة بعد القاهرة ولاسكندرية
هي اجمل مدينة علي الاقل في نظري
هي اكبر مدينة صناعية في جمهورية مصر العربية
اذن فمن المستفيد من كل ذلك
من الذي يخرب ومن الذي يضرب ومن الذي يقتل
ستندهشون عندما اجزم لكم ان اهل المحلة انفسهم وانا منهم لانعرف من الجاني
هل هم الامن لتشددهم وعنفهم
ام البلطجية المنحرفين
معروف عن المحلة باحتواء هؤلاء البلطجية منذ زمن بعيد فلماذا يقومون الآن بالتخريب والتدمير
ايا من كان السبب فانه قد نتج عنه مقتل طفل في الخامسة عشره من عمره
ايا من كان السبب فقد نتج عنه اصابة ما لايقل عن 70 من الاهالي وافراد الامن
لم نري اي من السؤولين المزعومين يتحركون لاحتواء الموقف او حتي يتواجدون في مواقع الاحداث ليروا بأنفسهم حجم النخريب والدمار الذي عم المدينة
لم نعد قادرين علي الخروج من المدينة للذهاب للكليات او الاعمال
واذا خرجنا فلن نضمن دخولنا للمدينة مرة اخري
اخواني والله اسألكم الدعاء بنية خالصة لكل أهالي المحلة
فليس لهم ذنب الا انهم يحبونها
دعواتكم

إضرابي

اولا قبل ان اكتب اي كلمة في هذا الموضوع اود ان اوضح الي كل مواطن مسيحي يقرأهذه الكلمات أنها ليست موجهة للاساءة الي رمز من رموزهم والله أبدا ولكنها الغيرة علي الاسلام التي وجهتني الي الكتابة في هذا الموضوع

انا مش مضرب علشان ارتفاع الاسعار ولا مضرب علشان احنا مش لا قيين العيش
انا مش مضرب علشان ارتفاع اسعار الحديد ولا مضرب علشان خايف علي مستقبلي لاني كده ببساطة ممكن في يوم منلاقيش شغل لان المقاولين مش قادرين يكملوا
انا مش مضرب علشان ورق المرشحين لم يقبل ولا حتي لان الانتخابات هتتزور ده اذا كان فيه انتخابات اصلا
انا مش مضرب لاعتقال مئات الشرفاء يوميا وآخرهم كان امبارح
انا مش مضرب علشان القصيدة اللي محمد صاحب مدونة صيد الخاطر هجاني فيها بالرغم من اني عارضته في نشرها لكن ان شاء الله هعرف اخد حقي منه
ههههههههههههههه

لكن انا بكل أسف مضرب لسبب آخر
استحي ان اقوله لكم في بلد الأصل فيها ان الديانة هي الاسلام
من عادتي اني اشاهد كل يوم برنامج القاهرة اليوم واللي بيقدمه الاعلامي عمرو اديب
لكن امبارح لقيته بيقول خبر غريب شويتين

كان بيحكي ان البابا شنودة كان في زيارة للندن وفي اثناء مغادرته اجبرته الاجهزة الامنية علي المرور في جهاز كشف المعادن
طبعا القساوسة اللي كانوا معاه رفضوا
اولا لان البابا شخصية ليس في مصر فقط بل في العلم اجمع
ثانيا لان هيئة البابا ولبسه يمنعه من كده لانه ممكن تكون الملابس تحتوي علي معادن او عمته او العصا او او ...الخ
لكن كل ده عادي حتي الآن
اللي فاجأني فعلا هو طلب عمرو أديب
عارفين طلب ايه من الحكومة لرد الاعتبار للبابا شنودة
عمرو أديب طلب من الحكومة استدعاء السفير البريطاني للاحتجاج
ايضا طلب من الحكومة ارسال رسالة احتجاج شديدة اللهجة لوزارة الخارجية البريطانية
طلب من الحكومة ارسال رسالة تطالب الحكومة البريطانية بالاعتذار للبابا عما حدث

يعني ازاي تطلب من الحكومة استدعاء السفير البريطاني وهي لم تستدعي لسفير الاسرائيلي للاحتجاج علي قتل آلاف الفلسطينيين كل يوم وكل ليلة
لماذا لم نستدع سفير الولايات المتحدة للاحتجاج علي قتل الالاف من العراقيين المسلمين كل يوم
ازاي نطلب كده والحكومة لم ترسل رسالة احتجاج لسوء معاملة الدكتور يوسف القرضاوي ومنعه من دخول لندن للعلاج

الاكبر اننا كيف نستدعيه ولم نستدعي او نطرد سفير النمارك احتجاجا علي الاساءة لسيدنا رسول الله صلي الله عليه وسلم
بالله عليكم كيف ذلك
كيف نطلب ذلك من حكومة وحكاما لم ينتفضوا ولم يحركوا ساكنا للدفعا عن رسول الله صلي الله عليه وسلم
لكنهم سينتفضوا للدفاع عن البابا
فهل أصبح البابا شنودة اهم من رسول الله صلي الله عليه وسلم
ام لانه متوفي فلن تضره الاساءة كما قال شيخ الازهر
اخواني انتفضوا لنصرة دينكم ولا تعيروا دنياكم انتباها
ولا حول ولا قوة الا بالله

حالي وحالهم

في أثناء زيارتي للوالد الكريم يوم الثلاثاء السابق راودني شعور غريب
بالرغم من أنه ليست أول مرة يراودني هذا الشعور لأنه راودني كثيرا في المرات السابقة خاصة عندما كان معتقلا في ليمان طرة يمكن لكبره او لاحتوائه علي جناة من جميع أنحاء الجمهورية
لكنه عندما راودني هذه المرة قررت أن أنقله لحضراتكم
عندما أدخل هذه الأماكن ربنا يعافيكم ويحميكم منها أحزن كثيرا لحال هؤلاء
أحزن كثير لوجود هؤلاء في هذا المكان
ولست أحزن علي حال الجناة فقط ولكن علي حال أهلهم وأولادهم وأسرهم
فعندما أنظر الي الأطفال المتواجدين أري في عيونهم نظرات الانكسار والحزن والأسي من الظروف التي وضعوا فيها ومن سؤال أفراد الشرطة عن تهم أبيهم فيجيبوا وهم في انكسار تام وحرج ليس له مثيل فمنهم من يجيب أنها مخدرت ومنهم من يجيب انها تأبيدة ومنهم من يجيب ربنا يعافيكم اعدام
بالرغم من ان الجناة من الممكن ان يكونوا ليسوا متهمين بتهم مسيئة لهم مثلا كقضية الشيك
لكنه حالهم فأولا وأخيرا هم جناة في حق المجتمع وفي حق أنفسهم وحق أولادهم
لكني نظرت الي حالي لأجد نفسي أسجد لله شكرا وأحمده لأني عندما قارنت نفسي بهم وجدت نفسي أدخل هذا المكان أو هذه الاماكن مرفوع الرأس شامخا لا أحرج لدخولها
فكل من في هذا المكان يحترمونا ويحترموا الاخوان كثيرا ويوقروهم ويلبوا لهم احتياجاتهم ولا يتأخرون عنهم
كل من في هذا المكان يعرف أن الاخوان ما جاءوا الي هذا المكان الا لأنهم أصحاب رأي وفكر
أصحاب قضية يدافعون عنها حتي آخر نفس يتنفسوه في هذه الدنيا
أصحاب فكر ينشروه ويوصلوه الي غيرهم لعله يكون المنقذ لهذه الامة
حتي لا يواسيني اخواني جزاهم الله خيرا فأنا لم أكتب هذا الكلام وأنا في حالة سيئة بالعكس لقد كنت سعيدا جدا عند كتابة هذا الموضوع
ولكن كما قلت هو شعور راودني فقررت أن أنقله لحضراتكم
وتحياتي