هي زمالة ولا صداقة

هي زمالة ولا صداقة

اولا احب اشكر كل اخواني اللي عبروني وايضا كل اللي معبرونيش

ثانيا ارحب بكم في اول بوست لي في المدونة

طبعا انتوا بتقولوا مال اكلام ده ومال الموضوع لكن معلش اصبروا علي شوية

الحقيقة انا بعتبر موضوع النهارده من اهم المواضيع اللي ممكن اي حد يكتب فبها واي حد يقرا عنها واللي شجعني علي الكتابة في الموضوع ده عدة اشياء اولها مناقشتي مع احد اصدقائي في هذا الموضوع وثانيها ان الموضوع ده يلتبس عند بعض الناس وخصوصا عندنا في الجامعة

موضوع اليوم الصداقة وايه هو الفرق ياجماعة بين الصداقة والزمالة وهل علشان انا ماشي مع فلان طول الليل والنهار يبقي هو فعلا صديقي او صاحبي واقدر ائتمنه علي كل اسراري .علشان كده ياجماعة انا بقولكم ان موضوع النهارده مهم جدا لكثير من الشباب

اولا ايه هو مفهوم الصداقة 00الصداقة هو انه تكون انت وصديقك روح واحدة في جسدين مختلفين يقدروا يفهموا بعض ولو حتي بالاشارة

(وانا بعتبرها زي ما يكون واحد وزوجته زي الزواج يعني (طبعامحدش يفهمني غلط انا بتكلم عن طبيعة الكلام بس مش حاجة تانية !!!!

وبيكون شعور جميل جدا انه يكون عندك صديق تقدر تفضفضله وتقوله كل اسرارك من غير ماتخاف انه يقولها لحد وكده احنا جينا لنقطة الفصل في الموضوع علشان شوية نقط الخصها كالتالي

اولا ان الصديق الصح هو مش بس اللي تقدر تقوله علي اسرارك لا كمان هو يقولك علي اسراره يعني زي مانا بكون طربش وبصارحه بكل حاجة هو ميعملش علي حويط

ثانيا انا شايف برده ان مش كل حاجة اقدر اقولها لصديقي لا فيه شوية حاجات مينفعش اقولها زي مثلا العلاقات الاسرية الشخصية والزوجية

كل ده كويس بس الاهم من ده كله مين هو الصديق اللي اقدر اعتمد عليه بالشكل ده

بصراحة ياجماعة انا عجبني اوي فيلم اوقات فراغ لانه فعلا ناقش قضايا عديدة منها مثلا الحب والشهوة والعلاقات الاسرية المفككة وايضا علاقة الاصدقاء لانه كلهم كانوا دايما جنب بعض في كل المصايب اللي اتعرضولها بصراحة هما دول الاصدقاء الصح 00بغض النظر عن الاخلاق والمصايب اللي عملوها في الفيلم 00لكن انا علقت علي نقطة واحدة وهي العلاقة بينهم فقط

وده ياخدنا لنقطة تانية هي انه الصديق لازم يكون ملتزم يعني الصديق اللي اكون ماشي معاه والاذان بياذن وميقليش تعالي نصلي ميبقاش صديق لانه زي مبنكون مع بعض في اوقات فراغنا وفي لعبنا وخروجاتنا وجلساتنا لازم نعين بعض علي طاعة الله عز وجل

لكن الصديق اللي اخلاقة كدة ولاكدة وطبعا ده مفهوم عند الشباب حاجة من اتنين لاما انا هتاثر به لاما هو اللي هيتاثر بيا واكيد انا اللي هتاثر به لان طبيعة النفس البشرية كدة تميل الي شهواتها فقط والكلام ده ياجماعة والله مش موضوع تعبير دة بيحصل فعلا وراقب نفسك كده هتلاقي نفسك بتتاثر بيه فعلا لكن تدريجيا وعلي المدي البعيد ومتقولش انك هتغيره لانة صعب

لكن في الاخر فيه خطوط حمراء لازم متعديهاش مع صاحبي مثلا مينفعش نسب لبعض ونشتم بعض بالاهل والكلام التاني اللي بيعف عنه اللسان وايضا انا شايف اني متدخلش في مشاكله الاسرية الشخصيو الا لما هو يسمحلي وياذن لي

واخيرا ياجماعة انا نقلت لكم وجهة نظري المتواضعة واللي تفتقد للخبرة عكس حضراتكم

وعلشان كده اتمني من حضراتكم انكم تزودوا الموضوع بوجهة نظركم وخبراتكم

وجزاكم الله خيرا